Ágæti hlustandi.

Ef þú streymir öllum plötum Hipsumhaps skilar það um 22 krónum í kassann af þeim tæplega 2.000 krónum sem þú borgar í mánaðarlega áskrift á streymisveitum. Til samanburðar færðu 20 krónur fyrir eina dós í endurvinnslunni.

Öll tónlist Hipsumhaps er nú aðgengileg á nýjan leik á öllum helstu streymisveitum. Ég kláraði fjármögnun á nýjustu plötunni, Algrím hjartans, með rassaferð til Amsterdam í lok maí. Ég vil þakka öllum sem styrktu útgáfuna, mættu á tónleika, bókuðu gigg eða keyptu varning upp á síðkastið. Sérstakar þakkir til Tónskáldasjóðs RÚV og Upptökusjóðs STEF fyrir mikilvæga fjárstyrki. Ekkert sérstakar þakkir til úthlutunarnefndar Tónlistarsjóðs.

Streymið þitt er kósý en ef þú vilt eignast tónlistina með áhrifaríkari hætti getur þú farið á hipsumhaps.is/streymt-fra-byli og borgað eitt gjald sem jafngildir kaupum á öllu safninu. Það er einhver misskilningur í gangi hjá fólki að það eigi tónlistina með því að vera með Spotify áskrift en það er ekki staðan. Þú leigir hana. En ef þú borgar, þá getur þú stoppað mig í Bónus og sagst eiga allar plöturnar. Ég lofa að brosa.

En að öllu tuði loknu: takk fyrir þolinmæðina, elska að deila með ykkur tónlist inn í sumarið og setjum stefnuna á næs tónleika á næsta ári með öllu genginu.

HH